नवनियुक्त स्वास्थ्य तथा जनसङ्ख्यामन्त्री पदम गिरीले आज पदभार सम्हाल्नुभएको छ । राष्ट्रपति विद्यादेवी भण्डारीसँग पद तथा गोपनीयताको सपथ लिइसकेपछि मन्त्री गिरीले मन्त्रालय पुगी पदभार सम्हाल्नुभएको हो । पदभार सम्हाल्दै उहाँले दुई महत्वपूर्ण निर्णय गर्नुभएको छ ।

सबैलाई न्यूनतम आधारभूत स्वास्थ्य सेवा पु¥याउनका लागि सबै तहका स्वास्थ्य संस्थामा न्यूनतम सेवा मापदण्ड लागू गर्ने उहाँले पहिलो निर्णय गर्नुभएको छ ।

अर्को उहाँले राष्ट्रिय आँखा स्वास्थ्य रणनीति लागू गर्ने निर्णय गर्नुभएको हो । दुवै निर्णय स्वीकृत गर्दै उहाँले गरिब, विपन्न नागरिकलाई स्वास्थ्य सेवा पु¥याउने मुख्य चुनौती रहेकाले सबै स्वास्थ्य संस्थामा न्यूनतम सेवा मापदण्ड लागू गरेर सबैलाई गुणस्तरीय स्वास्थ्य सेवा पु¥याउने बताउनुभयो । उहाँले गाउँ र सहरमा एकै किसिमका सेवा उपलब्ध गराउने मापदण्ड सहयोगी बन्ने बताउनुभयो ।

मन्त्री गिरीले स्वास्थ्य बीमा कार्यक्रमलाई प्रभावकारीरूपमा कार्यान्वयन गर्ने स्पष्ट गर्नुभयो । स्वास्थ्य राज्यमन्त्री डा तोसिमा कार्कीले पनि आजै पदभार ग्रहण गर्नुभएको छ । स्वास्थ्यमन्त्री गिरीसँगै राज्यमन्त्री डा कार्कीले पनि सबै तहका स्वास्थ्य संस्थामा न्यूनतम सेवा मापदण्ड र राष्ट्रिय आँखा स्वास्थ्य रणनीति लागू गर्ने निर्णय गर्नुभएको हो । राज्यमन्त्री डा कार्कीले संविधानले सुनिश्चित गरेको निःशुल्क आधारभूत स्वास्थ्य सेवालाई कार्यान्वयन गर्ने बताउनुभयो । उहाँले कोही पनि पैसाको अभावले उपचार गर्नबाट वञ्चित हुनुनपर्ने उल्लेख गर्नुभयो ।

आमनागरिकलाई गुणस्तरीय स्वास्थ्य सेवा उपलब्ध गराउनका लागि स्वास्थ्य संस्था तथा अस्पताललाई न्यूनतम सेवा मापदण्डको कार्यान्वयन सुनिश्चित गर्नका लागि स्वास्थ्य संस्थामा न्यूनतम सेवा मापदण्ड लागू गर्ने निर्णय गरिएको मन्त्रालयका नीति तथा योजना महाशाखा प्रमुख डा कृष्ण पौडेलले जानकारी दिनुभयो ।

नवनियुक्त मन्त्री गिरी गत मङ्सिर ४ गते भएको प्रतिनिधिसभाको निर्वाचनमा नेकपा (एमाले)का तर्फबाट पर्वतबाट निर्वाचित हुनुभएको थियो । आमा सीता गिरी र बेल गिरीबाट पर्वत जिल्ला कुश्मा नगरपालिका–३ दुर्लुङमा जन्मिनुभएका मन्त्री गिरी अनेरास्ववियुबाट विद्यार्थी राजनीतिमा सक्रिय हुनुभएको हो ।

पृथ्वीनारायण बहुमुखी क्याम्पस पोखराबाट स्नातकोत्तर तह उत्तीर्ण गर्नुभएका उहाँ सोही क्याम्पसको स्ववियु सभापतिसमेत हुनुभएको थियो । मन्त्री गिरी अनेरास्ववियुको १९औँ राष्ट्रिय सम्मेलनबाट केन्द्रीय सचिवालय हुँदै एमाले पर्वत जिल्ला कमिटी सदस्यमा रहेर काम गरिसक्नुभएको छ ।

एमाले पर्वतको आठौँ जिल्ला अधिवेशनबाट अध्यक्ष र एमाले र माओवादी केन्द्र एकता भई गठन भएको नेपाल कम्युनिष्ट पार्टी (नेकपा) पनि जिल्ला अध्यक्ष गरी दुई पटक पार्टीको जिल्ला अध्यक्षमा निर्वाचित हुनुभएको हो । उहाँ विसं २०७४ मा भएको आमनिर्वाचनमा पर्वत जिल्लाबाट प्रतिनिधिसभा सदस्य पदमा निर्वाचित हुनुभएको थियो ।

एमाले दशौँ राष्ट्रिय महाधिवेशनमा केन्द्रीय सदस्य तथा पर्वत जिल्ला सहइन्चार्जको भूमिकामा उहाँ रहनुभएको छ । राज्यमन्त्री डा कार्की गत मङ्सिरमा भएको प्रतिनिधिसभाको निर्वाचनमा राष्ट्रिय स्वतन्त्र पार्टीतर्फबाट ललितपुर क्षेत्र नं ३ बाट निर्वाचित हुनुभएको हो । उहाँ राजनीतिमा आउनुभन्दा अगाडि चिकित्सक पेशामा आबद्ध हुनुहुन्थ्यो ।