बलिउडकर्मी मिडियाबाट घेरिइरहेका हुन्छन् । त्यसैले उनीहरु स–साना घटनामा पनि खबर बनिरहेका हुन्छन् । कहिले उनीहरु मदिरामा लठ्ठ भएर हिँडेको दृश्य पनि सार्वजनिक हुन्छन् ।
केही कलाकार मदिराकै नसामा विभिन्न अभिव्यक्ति दिएर विवादमा पनि पर्छन् । नसामै विवादित स्टाटस लेखेर हास्यकलाकार कपिल शर्मा पनि एक समय निकै विवादमा पर्थे । जुन कुरा विभिन्न अन्तर्वार्तामा उनले स्वीकार गरेका छन् ।
कुनै पनि नसा लिनु राम्रो बानी हुँदै होइन, तर पार्टी र रमाइलो कार्यक्रममा मदिरा ‘ट्रेन्ड’का रुपमा विकसित भएको छ । फिल्ममा समेत मदिरा पिएको दृश्य आउँदा जनचेतनामूलक सन्देश देखाउनुपर्छ तर धेरै कलाकार यसको नसाबाट टाढा छैनन् । बलिउडका हजारौं स्टारमा औँलामा गन्न सक्ने नायकले मात्र आफूलाई मदिराबाट टाढा राखेका छन् ।
अमिताभ बच्चन
अमिताभ बच्चन मदिराको नसाबाट आफू टाढा भएको दाबी गर्छन् । फिल्ममा मदिरा पिएको देखिए पनि उनलाई सार्वजनिक ठाउँमा मदिरा पिएको नभेटिएको भारतीय मिडियाहरुको दाबी छ ।
उनी मदिरा मात्रै होइन धुमपान समेत गर्दैनन् । उनी शुद्ध शाकाहारी पनि हुन् । पार्टीमा उपस्थित हुँदा समेत उनी मदिराबाट टाढै रहन्छन् ।
जोन अब्राहम
जोन अब्राहम फिटनेसका कारण बलिउडमा प्रसिद्ध छन् । शरीरलाई सुगठित बनाउन खानेकुरामा विशेष ध्यान दिनुपर्छ । जोन आफ्नो शरीर बनाउनका लागि स्वच्छ र मात्रा मिलाएर मात्रै खाने अभिनेतामा पर्छन् ।
उनी मदिरा, धुमपान मात्रै होइन ‘जङ फूड’ समेत नखाने दाबी गर्छन् । उनी कडा समय तालिकामा चल्ने नायक हुन् । उनी रातिसम्म हुने पार्टीमा जाँदैनन् ।
अक्षय कुमार
नायक अक्षय कुमारको जीवनशैली बलिउडमा निकै चर्चामा रहन्छ । उनको साँझ १० बजे सुत्ने र पाँच बजे अगावै उठ्ने समय तालिका छ ।
उनी सकेसम्म कुनै पार्टीमा उपस्थित हुन चाहदैनन् । उनी मदिरा सेवन नगर्ने दाबी गर्छन् । नजिकबाट निहाल्नेहरुले पनि उनले रक्सी सेवन नगर्ने बताउँछन् ।
सिद्धार्थ मल्होत्रा
सिद्धार्थ अनुशासित अभिनेताको सूचीमा माथिल्लो स्थानमा पर्छन् । उनी विवादमा समेत कम आउँछन् । उनको स्वच्छ छवि जस्तै जीवनशैली पनि स्वच्छ छ ।
पञ्जाबी परिवारमा जन्मे–हुर्के पनि सिद्धार्थ मदिरा पिउँदैनन् । उनी रातको पार्टीमा सहभागी भए पनि मदिरामा भने हात लगाएको भेटिएको छैन ।
