इलेक्ट्रिक भेहिकल्स चार्जिङ र ब्याट्री समस्याहरूको कारण कमजोर विश्वसनीयताको साथ जुधिरहेको एक अमेरिकी गैर–लाभकारी संस्थाद्वारा गरिएको सर्वेक्षणले देखाएको छ ।

यद्यपी उपभोक्ताहरूले विद्युतीय सवारी साधनहरू तिव्र गतिमा खरिद पनि गरिरहेका छन् ।

औसतमा, नयाँ ईभीहरूमा पेट्रोल वा डिजेलबाट संचालन हुने सवारीसाधनको तुलनामा ७९ प्रतिशत बढी समस्याहरू भएको कन्जुमर रिपोर्ट्स (उपभोक्ता प्रतिवेदन) २०२३ को एनुअल अटो रिलायबिलिटी सर्भेले देखाएको छ ।

साथै हाइब्रिड भेहिकल्समा भने पेट्रोलबाट चल्ने सवारीसाधनको भन्दा कम समस्याहरू भएको तर प्लग–इन हाइब्रिडहरूमा १४६ प्रतिशत बढी समस्याहरू भएको उल्लेख छ ।

प्रतिवेदनका अनुसार हाइब्रिडमा आन्तरिक दहन इन्जिन (आईसीई), अर्थात् ग्यास र डिजेलबाट चल्ने सवारी साधनको तुलनामा २६ प्रतिशत कम समस्याहरू छन्।

इलेक्ट्रिक (विद्युतीय) पिकअपहरू सबैभन्दा कम भरपर्दो पाइएको छ भने कम्प्याक्ट कार, स्पोर्ट्स कार र साना पिकअपहरू १९ ओटा श्रेणीमा सबैभन्दा भरपर्दो रहेको उल्लेख गरिएको छ।

“लेगेसी अटोमेकर्सका लागि, (ईभीहरू) साँच्चै नयाँ प्रविधिहरू भएकाले तिनीहरूसँग ब्याट्री, चार्जिङ र मोटर्सको धेरै अनुभव हुँदैन,” कन्जुमर रिपोर्ट्सका अटो परीक्षणका वरिष्ठ निर्देशक जेक फिशरले भने।

सर्वेक्षणले टेस्लालाई यसको बडी हार्डवेयर, पेन्ट र ट्रिमका साथै ब्याट्री–पावर्ड भेहिकल्समा प्रयोग हुने क्लाइमेट सिस्टम (जलवायु प्रणाली) सँग सम्बन्धित मुद्दाहरूमा १४ औं स्थानमा राखेको छ।

तर इलन मस्कको नेतृत्वमा रहेको ईभी निर्माता अमेरिकी अटोमेकरहरू  मध्ये जनरल मोटर्सको ब्यूक पछिको दोस्रो उत्कृष्ट भएको भेहिकल रिलायबिलिटीको आधारमा जारी गरिएको ब्रान्ड र्याङ्किङले उल्लेख गरेको छ।

टेस्लाको मोटर, चार्जिङ टेक्नोलोजी र ब्याट्रीको सन्दर्भमा कम समस्याहरू रहेको रिपोर्टमा थप उल्लेख गरिएको छ।
मर्सिडीज–बेन्ज र स्टेलान्टिसको क्रिसलर ब्रान्डहरू क्रमशः २९ र ३० औं स्थानमा रहेको उल्लेख छ।

लेक्सस र टोयोटाले क्रमशः पहिलो र दोस्रो स्थान ओगट्नुका साथै एसियाली कार निर्माताहरूले शीर्ष १० स्थानमा प्रभुत्व जमाएका छन्।

कन्जुमर रिपोर्ट्स सर्भेले इन्जिन, इलेक्ट्रिक मोटर्स, ट्रान्समिसन र इन–कार इलेक्ट्रोनिक्स सहित २० ओटा समस्याका क्षेत्रहरू समेटेर सर्भे गरेको थियो।संस्थाले सन् २००० देखि २०२३ मोडल वर्षहरूमा ३ लाख ३० हजार भन्दा बढी सवारी साधनहरूको डाटा सङ्कलन गरेको र जसमा केही भर्खरै प्रस्तुत गरिएका २०२४ मोडलहरू पनि रहेको थप उल्लेख गरिएको छ।

प्रतिवेदनमा भनिएको छ कि बजारमा धेरै ईभीहरु आउँदैछन र अटोमेकरहरूले प्रत्येक मोडेलहरू धेरै संख्यामा बनाउन थालेका छन्, हामीले देखिरहेका छौं कि तिनीहरूमध्ये केही मोटरहरू, इभी चार्जिङ प्रणाली र इभी ब्याट्रीहरू सहित इभी ड्राइभ प्रणालीहरूका साथ समस्या छन्।