निरन्तर उतारचढावमा देखिएको शेयर बजारमा यो साता पहिलो कारोबारमा उछाल देखिए पनि दोस्रो कारोबार नै ओरालोतिर लागेको छ ।

हिजो आइतबार ४७.७५ अंकले बढेको बजारमा आज सोमबार त्यहीअनुरुप साथ मिल्न सकेन । 

गएको साता अन्तिम कारोबार सुधारतर्फ देखिएको शेयर बजारमा यो साता वृद्धिमा साथ मिल्नेगरी लामो समयपछि हिजो ठूलो अंकमा बढेको थियो । तर आज ११.२७ अंकले घटेर बजार १८९६.६७ बिन्दुमा झरेको छ । ६५ कम्पनीको मात्र शेयर मूल्य बढेको बजारमा १ अर्ब ७५ करोड ४७ लाख रुपैयाँको कारोबार भएको छ ।  

अर्थतन्त्रका अन्य सूचकहरूमा सुधार हुँदा पनि सेयर बजार वृद्धितर्फ जान नसकेको विश्लेषण भइरहँदा बजार उतारचढावमा नै देखिएको छ ।

अहिलेको अवस्थामा अब ठूला लगानीकर्ताले लिने बाटो र विश्वासयोग्य वातावरणले मात्र थप सुधारको अपेक्षा गर्न सकिने विश्लेषकहरू बताउँछन् ।

शेयर बजारमा लामो समयदेखि कुनै दिन सामान्य वृद्धि र कुनै दिन ओरालो लाग्ने प्रक्रियाबीच उतारचढाव देखिँदै आएको छ । स्थायी वृद्धितर्फ जाने आधारहरू रहेको बताइए पनि लगानीकर्ता विश्वस्त हुन सकेका छैनन् ।

अर्थतन्त्रमा सुधार हुँदै गएका आँकडाहरू आइरहँदा पनि पुँजी बजारमा भने निराशा छाइरहेको छ। शेयर कारोबार लामो समयदेखि निराशाजनक अवस्थामा देखिएको छ।

उचाइ लिने आशमा रहेका संगठित लगानीकर्ताहरू पनि बजारले अवस्थाले खुसी छैनन्। बजारमा लगानीकर्ता पर्ख र हेरको स्थितिमा नै देखिएका छन् ।