वर्षौंदेखि, मीरा मुरातीले च्याटजीपीटी र डीएएलएल–ई जस्ता क्रान्तिकारी उत्पादनहरूको विकास र डेलिभरीको निरीक्षण गर्दै ओपनएआईमा पर्दा पछाडि काम गरेकी छिन्। हाल उनी अन्तरिम प्रमुख कार्यकारीको रुपमा चर्चामा छिन्।

३४ वर्षीय मुरातीलाई शुक्रबार हाई–प्रोफाइल कम्पनीको शीर्ष स्थानमा पदोन्नती गरिएको थियो। ओपनएआईको बोर्ड अफ डाइरेक्टरले कम्पनीका सह–संस्थापक र प्रमुख कार्यकारी अधिकृत साम अल्टम्यानलाई हटाएर मुरातीलाई अन्तरिम सीईओ रुपमा नियुक्त गरिएको हो।

कम्पनीका अनुसार मुरातीसँग ‘अद्वितीय सीप’ थियो र यसले ‘स्थायी सीईओको लागि औपचारिक खोज सञ्चालन गर्दा निर्बाध संक्रमण’ प्रदान गर्नेछ।

गत वर्षदेखि प्रमुख प्राविधिक अधिकृतको पदभार सम्हाल्दै आए पनि हालका तथा पूर्व कर्मचारीले मुरतीले कम्पनीको हेड अफ अपरेसनका रूपमा काम गरिरहेको बताएको न्ययोर्कटाइम्सले उल्लेख गरेको छ।

उनले कम्पनीका इन्जिनियरहरूले तालिका अनुरुप च्याटजीपीटी भर्सन विकास गर्ने सुनिश्चित गरिन्। उनले माइक्रोसफ्टसँग कम्पनीको सम्बन्धलाई पनि ह्यान्डल गरिन्, एक लगानीकर्ता र साझेदार जसले ओपनएआईको टेक्नोलोजी प्रयोग गरेको छ। र, साथै उनले वाशिंगटन र युरोपमा कम्पनीको आर्टिफिसियल इन्टेलिजेन्स नीतिलाई आकार दिन मद्दत गरिन्।

‘उनीसँग प्राविधिक विशेषज्ञता, व्यावसायिक कौशलता र मिशनको महत्वको लागि गहिरो प्रशंसाको साथ टोलीहरू भेला गर्ने एक प्रदर्शित क्षमता छ,’ माइक्रोसफ्टका प्रमुख कार्यकारी सत्य नाडेलाले टाइम म्यागजिनका लागि उनको बारेमा एउटा लेखमा लेखेका छन्, ‘परिणामस्वरुप, मीराले सबैभन्दा रोमाञ्चक एआई निर्माण गर्न मद्दत गरेको छ। यस्तो प्रविधि जुन हामीले कहिल्यै देखेका थिएनौं।’

अल्बानियामा जन्मेकी र क्यानडामा पढेकी मुराती एक मेकानिकल इन्जिनियर हुन्। जसले डार्टमाउथ कलेजमा स्नातक विद्यार्थीको रूपमा हाइब्रिड रेसकार बनाएकी थिइन्। टेस्लामा काम गरेपछि उनी २०१८ मा ओपनएआईमा सामेल भएकी थिइन्। टेस्लामा उनले मोडल एक्स कारको विकासमा प्रमुख भूमिका खेलेकी थिइन्। र लिप मोशन स्टार्ट–अप जसले हात र औंलाको गतिलाई ट्र्याक गर्न कम्प्युटिङ प्रणालीको विकास गरेको थियो।

मुरातीले टेस्लाको कामले उनलाई एआईमा लाग्न र सोही क्षेत्रमा रोजगारी गर्न प्रेरित गरेको बताईन्। ओपनएआईले उनलाई एप्लाइड एआईको उपाध्यक्ष र साझेदारीहरूको रुपमा नियुक्त गरेको थियो।

तत्कालिन समयमा, कम्पनी गैर–नाफामुखी संस्था र आर्टिफिसियल इन्टेलिजेन्स सम्पूर्ण मानवतालाई फाइदा पुर्याउने सुनिश्चित गर्न समर्पित थियो। यसले पछि आफैलाई नाफामुखी कम्पनीको रूपमा पुनर्संरचना गरयो ताकि यसले आफ्नो एआई प्रविधि निर्माण गर्न आवश्यक पर्ने ठूलो रकम जुटाउन सकियोस्।

‘मैले सोचेको थिएँ कि यदि तपाईले इन्टेलिजेन्स निर्माण गर्दै हुनुहुन्छ भने, यो ब्रह्माण्डमा यस्तो कोर इकाई हो कि यसले सबै चिजलाई असर गर्छ,’ मुरातीले अगस्टमा सिलिकन भ्याली भेन्चर क्यापिटल फर्म एन्ड्रिसेन होरोविट्जले आयोजना गरेको कार्यक्रममा भनेकी थिइन्, ‘मानवताको सामूहिक इन्टेलिजेन्सलाई माथि उठाउन र वृद्धि गर्नु भन्दा प्रेरणादायी अरू के छ?’