सिन्धुली कारागारमा रहेका एक कैदीको मृत्यु भएको छ ।

सिन्धुलीको दुधौली नगरपालिका(१० का ३० वर्षीय विमल थापाको गएराति सुतेकै ठाउँमा मृत्यु भएको जिल्ला प्रहरी कार्यालय सिन्धुलीका डीएसपी चिरञ्जीवी दाहालले जानकारी दिए ।

डीएसपी दाहालका अनुसार बुधबार साँझ कारागारमै तिहार मनाएर देउसी खेलेर खाना खाइवरी सुतेका थापा आज बिहान ओछ्यानमै बेहोस अवस्थामा फेला परेका थिए ।

उनलाई उपचारका लागि सिन्धुली जिल्ला अस्पताल लगिएको थियो। अस्पताल पुर्याउनासाथ उनलाई चिकित्सकले मृत्यु भएको घोषणा गरेका डीएसपी दाहालले बताए । 

यही असोज १७ गतेदेखि थापा सवारी ज्यान मुद्दामा पुर्पक्षका लागि थुनामा थिए। थापाको मृत्युको कारण नखुलेको र घटनाको विषयमा अनुसन्धान भइरहेको प्रहरीले जनाएको छ । 

उनको शव पोष्टमर्टमका लागि जिल्ला अस्पतालमा लगिएको छ ।