हिजो आइतबार बिहानको भूकम्पबाट धादिङमा ६ वटा घर पूर्णरुपमा क्षति पुगेको जिल्ला प्रशासन कार्यालयले जानकारी दिएको छ ।
पछिल्ले विवरणअनुसार १८ वटा घरमा आंशिक क्षति पुगेको जिल्ला प्रशासन कार्यालयले जनाएको छ ।
आइतबार साँझसम्म ६ वटा घर क्षतिग्रस्त बनेको र १८ वटा घरमा आंशिक क्षति पुगेको विवरण प्राप्त भएको छ ।
घर भत्किएकालाई वैकल्पिक बसोबासका लागि त्रिपालको व्यवस्था गरिएको छ ।
भूकम्पले ज्वालामुखी गाउँपालिका–५ को सिम्ले, भाङे, कालिमाटीलगायतका ठाउँका घरहरूमा क्षति भएको छ ।
धादिङ, ज्वालामुखी–५ खरी केन्द्र गरेर आइतबार बिहान ७ः३९ बजे ६.१ म्याग्निच्युडको भूकम्प गएको थियो । त्यसपछि बिहान ८ः८ मा ४.२, ८ः२८ मा ४.३ र ८ः५९ मा ४.१ म्याग्निच्युडको परकम्प गएको थियो ।
अपराह्न ४ः०३ बजे ४.४ र साँझ ५ः३१ र ५ः३३ मा क्रमशः ५.० र ५.१ म्याग्निच्युडको परकम्प गएको राष्ट्रिय भूकम्प मापन तथा अनुसन्धान केन्द्रले जानकारी दिएको छ ।
दिनभरको कम्पनका कारण प्रभावित ठाउँमा स्थानीयहरू घरबाहिरै बसेका थिए ।
राष्ट्रिय भूकम्प मापन तथा अनुसन्धान केन्द्रले धादिङ केन्द्र गरी आइतबार गएको भूकम्प नयाँ कम्पन नभएको र २०७२ वैशाख १२ गते उत्तरी गोरखाको बारपाक केन्द्र गरी गएको भूकम्पको परकम्प भएको बताएको छ ।
