सरकारले युरोपेली मुलुक पोर्चुगलमा आवासीय दूतावास खोल्ने निर्णय गरेको छ ।
पछिल्लो मन्त्रिपरिषद् बैठकले त्यससम्बन्धी निर्णय लिएको परराष्ट्र मन्त्रालयले जनाएको छ । यद्यपी निर्णय गोप्य राखिएको हो ।
कांग्रेस सभापति शेरबहादुर देउवाको जोडबलमा नयाँ दूतावास खोल्ने निर्णय भएको हो । अब कांग्रेस पार्टीको कोटामा पोर्चुगलमा राजदूत नियुक्ति हुनेछ ।
देउवा निकटका नेता, व्यापारी वा कसैलाई राजदूत बनाउने योजनाअनुसार उक्त निर्णय भएको जनाइएको छ ।
मन्त्रिपरिषद् बैठकअघि यस विषयमा देउवा र प्रधानमन्त्री पुष्पकमल दाहाल प्रचण्डबीच सहमति भएको हो ।
आर्थिक मन्दीले मुलुक जर्जर भएका बेला युरोपेली मुलुकमा दूतावास खोल्ने निर्णय गर्नाका पछाडि व्यक्तिगत र निजी स्वार्थ गाँसिएको अन्तराष्ट्रिय जानकार बताउँछन् ।
हाल नेपालका ३० आवासीय दूतावास, ३ स्थायी नियोग र ७ महावाणिज्य दूतावास गरी विदेशमा ४० वटा कूटनितिक नियोग छन् ।
सरकारी कर्मचारीलाई विदेश पोस्टिङको अवसर र सत्तामा हुने राजनीतिक दललाई आसेपासे, राजनीतिक निकटस्थलाइ भर्ती गर्ने केन्द्रझैँ देखिन्छन् ।
