रोमानियाका लागि नेपाली अवैतनिक वाणिज्यदूत नवराज पोखरेलको राजीनामा परराष्ट्र मन्त्रालय आइपुगेको छ।
पोखरेलले वैदेशिक रोजगारीमा रहेका नेपाली श्रमिकको आर्थिक शोषण गरेको, म्यानपावर व्यवसायीबाट घूस खाएको र हुन्डी कारोबार गरेको विवरण सार्वजनिकपछि अस्ति बिहीबार राजीनामा दिएका थिए ।
वाणिज्यदूत पोखरेलले लेखे– नैतिकताका आधारमा राजीनामा दिएँ, अब सुविधाहरूबाट वञ्चित भएका छौँ
परराष्ट्र मन्त्रालयका एक उच्च अधिकारीले पोखरेलको राजीनामा प्राप्त भएको पुष्टि गर्दै थप कारबाही दसैँपछि हुने भएको छ ।
मन्त्रालयका ती अधिकारीले भने, ‘रोमानियाको प्रकरणले हामीलाई धेरै पाठ सिकाएको छ । राजनीतिक नेतालाई प्रयोग गरी अवैतनिक वाणिज्यदूतजस्तो मानार्थ पद लिने र त्यसको दुरुपयोग गर्ने गरेका यस्ता घटना अन्यत्र पनि देखिएका छन्। अब गम्भीर समीक्षा हुन्छ ।’
पोखरेलमाथि लागेका आरोपबारे छानबिन गरी अधिकारप्राप्त निकायबाट कारबाहीको प्रक्रिया अघि बढाउन सकिने ती अधिकारीको भनाइ छ ।
पोखरेलले नेपाली राहदानी नवीकरणका नाममा एक करोड रुपैयाँभन्दा बढी अतिरिक्त शुल्क उठाएको पाइएको छ भने श्रमिकको मागपत्र प्रमाणीकरणका लागि सिफारिस गर्दा उनले काठमाडौँमै विभिन्न व्यक्तिका खातामा घूस जम्मा गर्न लगाएको तथ्य पनि सार्वजनिक गरेको थियो ।
