चीनको हाङजाओमा सम्पन्न १९ औं एसियाली खेलकुदमा पदक विजेता नेपाली टोली आज मंगलबार स्वदेश फर्किएको छ ।
आइतबार हाङजाओमा सम्पन्न एसियन गेम्समा नेपालले १ रजत र १ कास्य पदक जितेको थियो ।
पदक विजेता टोलीका खेलाडी, प्रशिक्षक र अफिसियल आज स्वदेश फर्किएका हुन् ।
एसियाडमा करातेकी एरिका गुरुङले रजत र महिला कवड्डी टोलीले कास्य पदक जितेको थियो ।
एसियाडमा कराते र कवड्डीले पहिलो पटक पदक जितेका हुन्। एरिकाले महिला ६८ केजी तौल समूहमा रजत पदक जित्दै इतिहास रचिन् ।
यसअघि राष्ट्रिय खेलकुद परिषद् (राखेप) ले पदक विजेता टोलीलाई नगर परिक्रमा गराउँदै सम्मान गर्ने भने पनि इजरायलमा भएको हिंसामा १० नेपालीले ज्यान गुमाएपछि नगर परिक्रमा कार्यक्रम भने स्थगित गरिएको छ ।
यद्यपी राखेपले त्रिपुरेश्वरस्थित परिषद्मा सम्मान गर्ने भने जनाएको छ ।
यो पटकको एसियाडमा नेपालका २९ खेलका २ सय ५३ खेलाडीले सहभागिता जनाएका थिए ।
