‘भीआईपी यात्रु’को दबाबमा अग्रिम टिकट बुकिङ गरेका १६ जना चिकित्सकलाई मुगु विमानस्थलमै छोडेर समिट एयरलायन्सको जहाज नेपालगञ्ज उडेको छ ।
कर्णाली प्रदेशका पूर्वमुख्यमन्त्री महेन्द्रबहादुर शाहीसहितको टोली आएपछि अग्रिम टिकट बुकिङ गरेका चिकित्सकहरूलाई छोडेर समिटको जहाज नेपालगञ्ज उडेको डा. सुरज बज्राचार्यले जानकारी दिए ।
आफूहरूलाई मुगुको ताल्चा विमानस्थलमा छोडेर जहाज नेपालगञ्ज उडेको उनले बताए ।
जहाजमा माओवादी नेताहरू पूर्वमुख्यमन्त्री शाहीसहित माओवादी केन्द्रका नेता तथा पूर्वमन्त्री मातृका यादव, विमला केसी, धर्म शाही र प्रकाशबहादुर शाही नेपालगन्ज उडेका छन् ।
तर, अग्रिम टिकट लिएका उनीहरूलाई भने विमानस्थलमै छोडिएको छ । भिआईपीहरूको दबाबमा आफूहरूलाई छोडेर जहाज गएको उनले बताए ।
‘हामीले जति अनुरोध गर्दा पनि केही चलेन,’ उनले भने,’नेताहरूको दबाबमा उहाँहरूलाई लग्यो । हामीलाई यतै छोडियो ।’
विमानस्थलस्थित समिट एयरका ’सिनियर अफिसर’ दिपक शाहले भने केही जना बसेर बाँकी जानुस् भन्दा चिकित्सकहरूले नमानेको बताए ।
जहाजमा केही गम्भीर बिरामीसहित नेताहरू गएको उनले दाबी गरे ।
