सुदूरपश्चिमको प्रसिद्ध पर्यटकीय स्थल रामारोशन प्रवेशका लागि विदेशी पर्यटकले अनुमति पाएका छन् ।
यसअघि सम्बन्धित निकायको अनुमतिपत्र नहुँदा स्थानीय प्रशासनले बाटोमै रोकेका विभिन्न देशका २ सय ८३ जना विदेशी पर्यटकले एक सातापछि रामारोशन प्रवेश गर्न पाएका हुन् ।
भिजाका साथै व्यक्तिगत गतिविधि अध्ययन गरेर रामारोशन प्रवेशका लागि सहजीकरण गर्न गृह मन्त्रालयले निर्देशन दिएपछि रोकिएका पर्यटक गन्तव्यतर्फ गएको अछामका प्रमुख जिल्ला अधिकारी (सीडीओ) शरद कुमार पोखरेलले जानकारी दिए ।
‘भिजा भएकाहरुलाई उनीहरुको गतिविधि अध्ययन गरेर गन्तव्य जान दिन सहजीकरण गरेका छौँ,’ उनले भने, ‘धेरै संख्यामा विदेशी पर्यटकहरू आएका तर अनुमति नभएकाले हामीले रोकेका थियौँ ।’
प
र्यटन क्षेत्रमा सम्मेलनको आयोजनाबारे आफूहरूलाई कुनै जानकारी नभएको र पर्यटनसँग सम्बन्धित कुनै पनि निकायको अनुमतिपत्र नभएकाले विदेशी पर्यटकहरूलाई अछाम प्रशासनले बाटोमा रोकेको थियो ।
अमेरिका, क्यानडा, पोल्यान्ड, इटली, रसिया, स्विडेन, इजरायल, फ्रान्स, स्पेन, जर्मन, थाइल्यान्ड, जापान, भारतसहित ३५ भन्दा बढी देशका तीन हजार हाराहारीमा पर्यटक रामारोशन आउँदै छन् ।
अछाम प्रवेशद्वार चौखुट्टे, बेलखेत र रामारोशन क्षेत्रमा रोकिएका २ सय ८३ विदेशी पर्यटक गन्तव्यतर्फ लागेका छन् ।
पर्यटक आउने क्रम रोकिएको छैन। वर्ल्ड रेन्वो फेमिली नामक समूहको जमघट कार्यक्रममा रामारोशन घुम्न पर्यटकहरु रहेका हुन् ।
अहिलेसम्म अछाम पुगेकामध्ये अधिकांश भारतीय नाका हुँदै नेपाल प्रवेश गरेका पर्यटक छन् ।
हजारौंको संख्यामा एकैपटक विदेशीले त्यता बस्न चाहँदा सुरक्षा, शौचालयको समस्या, वन्यजन्तुलाई हुने नोक्सानी र फोहोरमैलाजस्ता विषय चुनौती बनेका छन् ।
विदेशी पर्यटकप्रति प्रहरीले सूक्ष्म निगरानी पनि राखेको छ ।
पर्यटकले गैरकानुनी क्रियाकलाप गरेको पाइए तत्काल पक्राउ गरेर कारबाही गरिने जिल्ला प्रहरी कार्यालय अछामका डीएसपी सन्तोष पाठकले बताए ।