प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल प्रचण्ड आज अमेरिका भ्रमणमा जाँदै छन ्।
 

संयुक्त राष्ट्रसंघको ७८औँ महासभामा भाग लिन उनी न्युयोर्क प्रस्थान गर्ने भएका हुन्। उनी साँझ ६ बजेको त्यसतर्फ उड्नेछन् ।
 

प्रधानमन्त्रीको भ्रमणमा उनकी छोरी गंगा दाहाल, परराष्ट्रमन्त्री एनपी साउद, परराष्ट्र सचिव भरतराज पौड्याल लगायत सहभागी हुनेछन्। परराष्ट्रमन्त्री साउद भने यसअगाडी नै न्यूर्याक पुगिसकेका छन् ।
 

आज भने प्रधानमन्त्री, प्रधानमन्त्रीका स्वकिय सचिव समेत रहेकी छोरी गंगा, सुरक्षाकर्मी र फोटो पत्रकार प्रदीपराज वन्त मात्रै त्यसतर्फ प्रस्थान गर्ने कार्यक्रम छ ।
 

उनले आगामी बुधबार संयुक्त राष्ट्रसंघको महासभालाई सम्बोधन गर्ने कार्यक्रम छ। त्यसको अघिल्लो दिन मंगलबार उनी अमेरिकाका राष्ट्रपति जो बाइडेनले आयोजना गर्ने स्वागत समारोहमा सहभागी हुनेछन् ।

अमेरिकामा रहँदा प्रधानमन्त्रीले संयुक्त राष्ट्रसंघको दिगो विकास लक्ष्य शिखर सम्मेलन र जलवायु महत्त्वाकांक्षा शिखर सम्मेलन लगायतका कार्यक्रमलाई पनि सम्बोधन गर्ने तालिका छ ।
 

उनले संयुक्त राष्ट्रसंघका महासचिव एन्टोनियो गुटेरेससहित विभिन्न देशका समकक्षीसँग द्विपक्षीय भेटवार्ता गर्ने कार्यक्रम पनि छ ।
 

प्रधानमन्त्री प्रचण्ड असोज ५ गते उतैबाछ चीन जाने कार्यक्रम छ ।
 

चीन भ्रमणका क्रममा ऊर्जा, भौतिक पूर्वाधार, यातायात, कृषिलगायत विषयमा दुई पक्षीय छलफल र समझदारी हुने परराष्ट्र मन्त्रालयले जनाएको छ ।