प्रहरीको केन्द्रीय अनुसन्धान ब्यूरो (सीआईबी)ले आज हङकङबाट ल्याइएको झण्डै ६१ किलो सुन तस्करी प्रकरणको अनुसन्धान प्रतिवेदन जिल्ला सरकारी वकिल कार्यालयमा बुझाउने तयारी गरेको छ ।
हिजो मंगलबार बुझाउने भनिएपनि प्रतिवेदन लेखनमा ढिलाई भएकाले आज बुधबार बुझाउने तयारी भएको सीआईबीले जनाएको छ ।
संगठित अपराधको मुद्दामा ६० दिनभित्र मुद्दा दायर भैसक्नुपर्छ । भदौ ३१ गते यो काण्डको ६० दिन पुग्छ ।
सीआईबीको प्रतिवेदनको आधारमा सरकारी वकिल कार्यालयले जिल्ला अदालतमा मुद्दा दायर गर्नेछ ।
‘बयान लिने र सोधपुछ कार्य चलिरहेकाले सीआईबीले हिजो प्रतिवेदन बुझाएको छैन । प्रतिवेदन लेख्ने काम पनि बाँकी रहेछ । आजसम्म सरकारी वकिल कार्यालयमा आइपुग्छ ,’ सरकारी वकिल कार्यालय काठमाडौंका प्रवक्ता महेश खत्रीले पब्लिकपानासँग भने ।
सो प्रकरणमा अहिलेसम्म ३१ जना पक्राउ परेका छन् भने ३० जना प्रहरी हिरासतमा छन् ।
पक्राउ पर्नेमा त्रिभुवन विमानस्थल भन्सार कार्यालयका कर्मचारीसहित नेपाली, भारतीय र चिनियाँ नागरिक पनि रहेका छन् ।
गत साउन ३ गते राजस्व अनुसन्धान विभागले भन्सार पास भएको सुन पक्राउ गरेको थियो ।
विभागले आवश्यक अनुसन्धान सकेको १८ दिनपछि सुन प्रकरणको अनुसन्धान सीआईबीलाई दिएको थियो ।
