त्रिभुवन विमानस्थल बाहिरबाट समातिएको ६० केजी सुन तस्करीमा संलग्नताको आशंकामा नेपाली प्रहरीको केन्द्रीय अनुसन्धान ब्युरो (सीआईबी)ले निवर्तमान उपराष्ट्रपति नन्दबहादुर पुनका छोरा दीपेशसँग बयान लिएको छ ।
सुन तस्करी प्रकरणमा पक्राउ परेका चिनियाँ मुलका बेल्जियन नागरिक दावा छिरिङसँगको कनेक्सनका आधारमा सीआईबीले दीपेशसँग सोमवार बयान लिएको हो ।
‘दावासँगको कनेक्सन र अन्य सूचनाका आधारमा दिपेशसँग बयान लिइएको हो,’ प्रहरीले जनाएको छ ।
सीआईबीले ६० केजी सुन तस्करी प्रकरणमा संलग्नताको आशंकामा १०० जनाको सूची बनाएर अनुसन्धान गरिरहेको छ ।
यसैबीच. विमानस्थल भन्सार कार्यालयका निवर्तमान प्रमुख अरुण पोखरेलसँग बयान लिएको छ । साउन ३ गते बरामद ६० किलो सुन तस्करी प्रकरणबारे त्यो बेला विमानस्थल भन्सार प्रमुख रहेका पोखरेलसँय सिआइबीले बयान लिएको हो ।
प्रमुख भए पनि पोखरेल हङकङबाट ६० किलो सुन तस्करी हुँदा बिदामा थिए ।
विमानस्थल भन्सारका कर्मचारीको मिलेमतोमा भन्सारले पक्राउ गरेको भेपको ९ किलो सुन गायब भएको विषयमा त्यतिबेला विमानस्थल भन्सारको प्रमुख रहेका पोखरेलसँग जानकारी लिइएको हो ।
पोखरेलमाथि अनुसन्धान गर्न सरकारी वकिल कार्यालय काठमाडौँले अख्तियार दुरुपयोग अनुसन्धान आयोगमा पनि पत्राचार गरिसकेको छ।
