चीनको होङझाउमा सेप्टेम्बर २३ देखि हुने १९औं एसियन गेम्सअन्तर्गत नेपाली क्रिकेट टोलीले समूह चरणमा जापान र कम्बोडियासँग खेल्ने भएको छ ।
नेपालले पहिलो खेल सेप्टेम्बर २७ मा जापानसँग खेल्नेछ भने अक्टोबर १ मा कम्बोडियासँग खेल्नेछ । क्वाटरफाइनल अक्टोबर ३ र ४ मा हुनेछ । नेपाल, जापान र कम्बोडिया समूह ’बी’ मा छन् । ’ए’ मा अफगानिस्तान र मंगोलिया, ’सी’ मा हङकङ, चीन र सिंगापुर तथा समूह ’डी’ मा बहराइन, माल्दिभ्स् र मलेसिया छन् ।
टी–ट्वान्टी शैलीमा आयोजना हुने प्रतियोगिताको प्रत्येक समूहका शीर्ष टोली क्वाटरफाइनलमा पुग्नेछन् । भारत, पाकिस्तान, श्रीलंका र बंगलादेशले भने सिधै प्रवेश पाएका छन् । सेमिफाइनल अक्टोबर ६ मा हुनेछ । फाइनल र तेस्रो स्थानको खेल ७ अक्टोबरमा हुनेछ ।
जापान र कम्बोडिया तुलनात्मक रुपमा कमजोर टोली भएकाले नेपाल क्वाटरफाइनलमा पुग्ने सम्भावना बलियो छ । नेपाल टी–ट्वान्टी आई वरीयतामा १७औं स्थानमा छ ।
जापान ५३औं स्थानमा रहँदा कम्बोडिया शीर्ष ८७ को वरीयतामै छैन । नेपालले रोहित पौडेलको कप्तानीमा खेल्ने टोली घोषणा गरिसकेको छ ।
