नेकपा (एमाले) को जनसङ्गठन राष्ट्रिय युवा संघ नेपालका केन्द्रीय सदस्य डिल्लीराज शर्माले चौरजहारी नगरपालिका–४ स्थित रेशम खोला दोहन विषयमा सामाजिक सञ्जालमा व्यक्त विचारलाई लिएर प्रहरीले पक्राउ गरेको छ ।
रुकुमपश्चिमको चौरजहारी नगरपालिका–५ निवासी शर्मालाई जिल्ला प्रहरी कार्यालय रुकुमपश्चिमले साइबर क्राइम गरेको आरोपमा पक्राउ गरेको आजको गोरखापत्रले समाचार प्रकाशित गरेको छ ।
खोला दोहनमा एमबी कन्स्ट्रक्सन र चौरजहारी नगरपालिकाका पूर्वनगर प्रमुख विशाल शर्माको संलग्नता रहेको भनेर सामाजिक सञ्जालमा अडियो तथा भिडियो सामग्री सार्वजनिक गरेका थिए ।
उक्त कार्यमा आफ्नो कुनै संलग्नता नरहेको, रिसइबी साँध्नलाई सामाजिक सञ्जालको दुरुपयोग गरेको, मानमर्दन गरेको, सार्वजनिक प्रतिष्ठामा आँच आउने काम गरेको भन्दै पूर्वनगर प्रमुख शर्माले उनी विरुद्ध प्रहरीमा जाहेरी दिएका थिए ।
सोहो जाहेरीको आधारमा प्रहरीले डिल्लीराज शर्मालाई पक्राउ गरेको जनाएको छ। जिल्ला प्रहरी कार्यालयका प्रहरी नायब उपरीक्षक नमराज भट्टराईकाअनुसार साइबर क्राइम मुद्दामा शर्मालाई पक्राउ गरिएको हो ।
बुधबार नै अदालतबाट १० दिनको म्याद थपेर शर्मालाई थुनामा राखिएको छ ।
उता नेकपा (एमाले) रुकुमपश्चिमले पार्टीको जनसङ्गठन राष्ट्रिय युवा संघ नेपालका केन्द्रीय सदस्य डिल्लीराज शर्मालाई रिहाइको माग गरेको छ ।
पार्टीका जिल्ला अध्यक्ष नन्दराम देवकोटाले प्रेस विज्ञप्तिमार्फत शर्माको रिहाइको माग गरेका हुन् । विज्ञप्तिमा चौरजहारी नगरपालिका–५ स्थित रेशम खोला विगत आठ वर्षदेखि दोहन भइरहेको र उक्त कार्यको विरोधमा नागरिकस्तरबाट खबरदारी गरेको कार्यलाई राजनीतिक र शक्तिको आडमा कुल्चिने प्रयास भइरहेको समाचारमा जनाइएको छ ।