नेकपा एमालेले कोशी प्रदेशमा असंवैधानिक तरिकाले सरकार गठन भएको भन्दै तत्काल सरकार भंग गरेर अर्को सरकार गठनको प्रक्रिया थालनी गर्न माग गरेको छ ।

ललितपुरको च्यासलस्थित पार्टीको मुख्यालयमा बसेको एमाले सचिवालय बैठकले कोशीमा नयाँ सरकार गठनको माग गरेको हो ।
सभामुखको समेत हस्ताक्षर लिएर गठबन्धनका तर्फबाट उद्धव थापालाई मुख्यमन्त्री चयन गरिनु असंवैधानिक कदम भएको एमालेको ठहर छ । थापा नेतृत्वको सरकार भंग गरेर नयाँ सरकार बनाइनुपर्ने एमालेको माग छ । 

आज शनिबारको बैठकले ६ बुँदे समसामयिक प्रस्ताव पारित गरेको छ । एमाले उपमहासचिव प्रदीप ज्ञवालीका अनुसार देशभरि महामारीका रुपमा पशुचौपायामा फैलिएको लम्पी स्कीन रोग नियन्त्रणका लागि तत्काल कदम चाल्न, खोपको प्रभावकारी प्रबन्ध गर्न र किसानलाई राहत सरकारको ध्यानाकर्षण गराएको छ ।

मिटरब्याजसम्बन्धी विधेयक पारित गर्न विपक्षी दलले असहयोग गरेको भनेर भ्रमपूर्ण समाचारका फैलाएको दाबी गर्दै एमालेले विधेयक तत्काल अघि बढाउन माग गरेको छ । सत्ता गठबन्धनका घटकका विवादले सो विधेयक निष्क्रिय भएको एमालेले ठहर छ ।

एमालेले प्राज्ञिक क्षेत्रमा राजनीतिक हस्तक्षेप भएको भन्दै त्यसको निन्दा गरेको छ  । प्राकृतिक विपत्तिसँग जुध्ने सरकारको तयारी फितलो रहेको एमालेको आरोप छ । बाढी पहिरोमा घरबार गुमाएकाहरुलाई तत्काल पुनःस्थापना गर्न र सडक पूर्वाधार पुनः निर्माण गर्न उसले सरकारसँग माग गरेको छ ।

उपमहासचिव ज्ञवालीका अनुसार आजको बैठकले केही संगठनात्मक निर्णय गरेको छ । जसअनुसार एमाले स्थायी कमिटी सदस्य गुरु बराललाई एमाले बागमती प्रदेश इन्चार्जको जिम्मेवारी तोकिएको छ भने केही पदाधिकारीको जिम्मेवारीमा सामान्य हेरफेर गरिएको छ ।