नेकपा (एकीकृत समाजवादी) का अध्यक्ष माधवकुमार नेपालले धेरै नेपालीहरु भएको देशमा अवैतनिक राजदुतका माध्यमबाट राहदानी दिने पहल थाल्न सरकारसँग आग्रह गर्नुभएको छ । 
बुधवार अन्तर्राष्ट्रिय सम्बन्ध र पर्यटन समिति बैठकमा बोल्दै उहाँले यस्तो बताउनुभएको हो ।

उहाँले धेरै नेपालीहरु बसोवास गर्ने देशका शहरहरुमा अवैतनिक राजदुतका माध्यमबाट समयमा नै राहदानी नविकरण गर्नुपर्ने बताउनु भयो । उहाँले कतिपय देशका दुतावासमा कर्मचारीहरु कम हुँदा समयमा नै काम सम्पन्न गर्न कठिनाइ भएको गुनासो आइरहेकोप्रति सरकारको ध्यानाकर्षण गराउनु भयो ।

उहाँले समयमा नै राहदानी खरिद गर्नसके कम मूल्य पर्ने बताउनु भयो । उहाँले सरकारले सिमित समसभित्र कति राहदानी आवश्यक पर्छ ? भन्नेकुरालाई ध्यानमा राखि समयमै खरिद गर्न सक्नुपर्ने बताउनु भयो ।

उहाँले भेरियसनको नाममा म्यानुपुलेशन बढी हुने भन्दै यसतर्फ सचेत रहनुपर्ने बताउनु भयो । उहाँले समयमा नै राहदानी खरिद गर्न नसके राहदानीको मूल्य ठेकेदारहरुले बढाउँदै लैजाने गरेको बताउनु भयो । 
उहाँले भन्नुभयो, ‘राहदानी प्रिन्ट गर्न कति समयसम्म उसले सप्लाई गर्नसक्छ ? भन्नेकुरा पक्कै ध्यानमा राखिएको हो । यो भेरियसनको नाममा म्यानुपुलेशन ज्यादा हुने गर्दछ । भेरियसनको नाममा विभिन्न ठेक्कापट्टामा मूल्य वृद्धि गर्ने हुन्छ । थाहा छ भने समयमा गर्दा कम पर्छ । समयमा गर्न सकिएन भने भाउ बढाउँछन् । यसमा कत्तिको ध्यान गएको छ ? यसमा कस्ता विसंगति, विकृति देखिए ? बिचौलियाका समस्या होलान् । विचौलियाहरु जनता र कर्मचारीबीच कनेक्शन गर्ने कति छन् ? यसबारेमा के छ ? विभिन्न ठाउँमा स्टाफहरुको कमीका कारणले धेरै समय कुर्नुपर्ने स्थिति रहेको गुनासो छ । नेपालीहरुको उपस्थिति बाक्लो भएको ठाउँमा धेरै कर्मचारी राखेर समयमा नै काम सम्पन्न गरिदिनुपर्छ । एक ठाउँमा दुतावास हुन्छ, शहर र मानिस फरक फरक ठाउँमा छन्, खर्च र समयको कुरा छ । यसलाई सहज बनाउन के गर्ने ? अवैतनिक राजदुतहरुलाई किन दिन नसक्ने ? हामीले उनीहरुसँगबाट पनि राहदानी दिन सकिन्छ ।’

अध्यक्ष नेपालले राहदानी खरिदमा देखिएका विकृति, विसंगतिमा सरकारको ध्यान कति गएको छ ? भन्दै प्रश्नसमेत गर्नुभयो ।