खाना पकाउने ग्यास सिलिन्डर विस्फोटबाट घाइते भएका कांग्रेस सांसद चन्द्र भण्डारीलाई थप उपचारका लागि भारत को मुम्बई लगिएको छ ।
श्री एयरलाइन्सको जहाजबाट मुम्बई लगिएका सांसद भण्डारीको बिमानभित्रै क्रिटिकल युनिट व्यवस्थापन गरी नर्भिक इन्टरनेशनल हस्पिटलका एनेथेसिष्ट डा. प्रदीप तिवारी नेतृत्वको ६ जनाको टोलीलाई पठाइएको छ ।
नेपाली मेडिकल टिमले बिमानमा भण्डारीको स्वास्थ्य अवस्थालाई थप बिग्रन नदिन आवश्यक सहजीकरण गर्नेछ ।
डा. प्रदीपको टोलीले मुम्बईस्थित सिबाजी इनटरनेशन एयरपोर्टमै मुम्बईस्थित नेशनल बर्नस् सेन्टरको टिम समक्ष भण्डारीलाई हस्तान्तरण गर्ने र उक्त टिम एयरपोर्टबाट आज काठमाण्डौ फर्किनेछ ।
नेपालस्थित भारतीय दुतावास र भारतस्थित नेपाली दुतावासले उपचारका लागि आवश्यक सहजीकरण गरेको कंग्रेसका एक नेताले जानकारी दिए ।
ग्यास सिलिन्डर विस्फोट भएपछि बुधबार राति कीर्तिपुरस्थित क्लिफ्ड एण्ड बर्न सेन्टरमा उपचारका लागि सांसद भण्डारी र उनकी आमा हरिकला भण्डारीलाई लगिएको थियो ।
शरीरको करिब ३० प्रतिशत भाग जलेको भण्डारीलाई थप उपचारका लागि सुविधा सम्पन्न अस्पताल लैजान बर्न सेन्टरले भनेपछि उनलाई बिहीबार भारत लगिएको हो । तर, ७० प्रतिशत शरीरको भाग जलेका हरिकलाको भने बिहीबार उपचारका क्रममा निधन भएको छ ।
३० प्रतिशत शरीरको भाग जलेको र धुवाँ स्वासनलीमा गएकाले सांसद भण्डारीको स्वास्थ्य थप जटिल बनेको हो ।
