नेपाल समाजवादी पार्टी (नयाँ शक्ति) को अध्यक्षमा डा. बाबुराम भट्टराई निर्वाचित भएका छन् ।

गत माघ २७ गतेयता काठमाडौंको प्रज्ञा प्रतिष्ठानमा जारी पार्टीको पहिलो महाधिवेशनमा अध्यक्ष पदका लागि पनि निर्वाचन भएको थियो ।

निर्वाचनमा भट्टराईसहित युवा नेता नेत्र चापागाईंले पनि उम्मेदवारी दिएका थिए । कुल ८७३ मत खसेकोमा डा. भट्टराईले ८०२ मत प्राप्त गरेका थिए भने चापागाईले ७१ मत पाएका छन् ।

नयाँ शक्तिले पार्टीका सबै पदाधिकारी निर्वाचनमार्फत चुनिनुपर्ने व्यवस्था गरेको छ । सोहीअनुरूप पदाधिकारी चुनिइसकेका छन्।

महिला उपाध्यक्षमा डा.भट्टराईकै छोरी मानुषी यमी भट्टराई, दलित उपाध्यक्षमा दर्गा सोव र कोषाध्यक्षमा हरि रिजाल निर्विरोध निर्वाचित भएका थिए ।

नयाँ शक्तिले ११ सदस्यीय पदाधिकारी ९९ सदस्यीय केन्द्रीय समिति चयन गरेको छ ।