काठमाडौँ । अमेरिकी राष्ट्रपति डोनाल्ड ट्रम्पले दक्षिण अफ्रिकालाई दिइने सहयोग रोक्ने धम्की दिएका छन् । ट्रम्पले सामाजिक सञ्जालमार्फत दक्षिण अफ्रिकालाई यस्तो चेतावनी दिएका हुन् ।
ट्रम्पले भनेका छन्- 'दक्षिण अफ्रिकाले भूमि कब्जा गरिरहेको छ र केही समूहका मानिसहरूलाई नराम्रो व्यवहार गरिरहेको छ । यो एकदमै नराम्रो अवस्था हो जसको बारेमा कट्टरपन्थी वामपन्थी मिडियाले धेरै कुरा गरिरहेको छैन ।
सबैको अगाडि ठूलो मात्रामा मानव अधिकार उल्लङ्घन भइरहेको छ । अमेरिकाले यो सहने छैन र यसको विरुद्ध कारबाही गर्नेछ ।'
राष्ट्रपति ट्रम्पले परिस्थितिको अनुसन्धान नभएसम्म दक्षिण अफ्रिकालाई भविष्यमा दिइने सबै सहयोग रोक्ने बताएका छन् ।
अमेरिकी सरकारको तथ्याङ्क अनुसार सन् २०२३ मा अमेरिकाले दक्षिण अफ्रिकालाई ४४ करोड डलरको सहायता दिएको थियो ।
दक्षिण अफ्रिकी राष्ट्रपति सिरिल रामाफोसाले गत महिना राष्ट्रपति ट्रम्पसँग दक्षिण अफ्रिकाको सम्बन्धको बारेमा चिन्तित नरहेको बताएका थिए ।
राष्ट्रपति रामाफोसाले भनेका थिए, 'जनवरीको अन्त्यमा चुनाव जितेपछि राष्ट्रपति ट्रम्पसँग कुरा गरेको छु र म ट्रम्प प्रशासनसँग काम गर्न उत्सुक छु ।'
आफ्नो पहिलो कार्यकालमा, राष्ट्रपति ट्रम्पले दक्षिण अफ्रिकामा गोरा किसानहरूको कथित सामूहिक हत्या र जग्गा कब्जाको अनुसन्धान गर्ने वाचा गरेका थिए।
