काठमाडौँ । न्युजील्याण्डका विस्फोटक ब्याट्सम्यान मार्टिन गप्टिलले अन्तर्राष्ट्रिय क्रिकेटबाट सन्यासको घोषणा गरेका छन् ।
३८ वर्षीय गुप्टिलले २००९ मा डेब्यू गरेका थिए र आधिकारिक रूपमा आफ्नो १४ वर्षे अन्तर्राष्ट्रिय करियरको अन्त्यको घोषणा गरेका छन् । उनले अक्टोबर २०२२ मा न्युजिल्याण्डका लागि आफ्नो अन्तिम खेल खेलेका थिए । गप्टिलले न्युजिल्याण्डका लागि तीनै ढाँचामा जम्मा ३६७ खेल खेलेका छन्।
गप्टिलले आफ्नो करियरमा २३ अन्तर्राष्ट्रिय शतक बनाए र सीमित ओभरको ढाँचामा पनि आफ्नो कौशल प्रदर्शन गरे । गप्टिल टी-२० मा न्युजील्याण्डका लागि सर्वाधिक रन बनाउने खेलाडी हुन् । उनले १२२ खेलमा ३५३१ रन बनाएका छन् । उनले एकदिवसीय खेलमा ७३४६ रन बनाएका छन् र यस ढाँचामा न्यूजील्याण्डका लागि सर्वाधिक रन बनाउने खेलाडी हुन् । उनीभन्दा अगाडि रोज टेलर र स्टीफन फ्लेमिङ छन् ।
गुप्टिल आफ्नो पहिलो एकदिवसीय खेलमा शतक बनाउने पहिलो न्युजील्याण्डका ब्याट्सम्यान हुन् । उनले यो उपलब्धि २००९ मा वेस्टइन्डिजविरुद्ध हासिल गरेका थिए । त्यस वर्षको पछि, उनलाई आईसीसीको विश्व एकदिवसीय ११ मा समावेश गरिएको थियो । गुप्टिलले आफ्नो करियरमा धेरै उत्कृष्ट इनिङ्स खेलेका छन्, जसमा २०१५ को विश्वकपको क्वार्टरफाइनलमा वेस्ट इन्डिज विरुद्ध २३७ रनको कीर्तिमानी इनिङ्स पनि समावेश छ । यो विश्वकपमा कुनै पनि ब्याट्सम्यानले बनाएको उच्चतम व्यक्तिगत स्कोर हो र उनी एकदिवसीयमा दोहोरो शतक बनाउने पहिलो न्युजिल्याण्डका ब्याट्सम्यान हुन् । गप्टिलले २०१३ मा इङ्गल्याण्डविरुद्ध अविजित १८९ र २०१७ मा दक्षिण अफ्रिका विरुद्ध अविजित १८० रन बनाएका थिए ।
गप्टिलले टी-२० मा दुई यादगार शतक बनाएका छन्। उनले २०१२ मा दक्षिण अफ्रिका विरुद्ध ६९ बलमा अविजित १०१ र २०१८ मा अष्ट्रेलिया विरुद्ध ५४ बलमा १०५ रन बनाएका थिए। गुप्टिलले टेस्टमा पनि उत्कृष्ट प्रदर्शन गरेका छन् र ४७ खेलमा २५८६ रन बनाएका छन् । उनले यस ढाँचामा तीन शतक बनाएका छन् र टेस्टमा उनको व्यक्तिगत उच्चतम स्कोर २०१० मा बंगलादेश विरुद्ध १८९ रन हो। यसबाहेक, गुप्टिलले २०११ मा जिम्बाब्वे विरुद्ध १०९ रन र २०१५ मा श्रीलंका विरुद्ध १५६ रन बनाएका थिए ।
