काठमाडौँ । भारतका पूर्वप्रधानमन्त्री डा. मनमोहन सिंहको आज अन्तिम संस्कार हुदै छ । ९२ वर्षका सिंहको विहिबार राति दिल्लीस्थित एम्स अस्पतालमा निधन भएको थियो ।
शुक्रबार भारतीय प्रधानमन्त्री नरेन्द्र मोदी र गृहमन्त्री अमित शाह उनको निवास पुगेर श्रद्धाञ्जली अर्पण गरेका थिए । यहाँ केन्द्रीय मन्त्रिपरिषद्को बैठकमा पूर्वप्रधानमन्त्रीप्रति श्रद्धाञ्जली अर्पण गरी शोक प्रस्ताव पारित गरिएको थियो । भारत सरकारले सिंहको निधनमा सात दिन देशभर राष्ट्रिय शोकको घोषणा गरेको छ ।
सिंहको अन्तिम यात्रा शनिबार बिहान ९:३० बजे एआईसीसी (अखिल भारतीय कांग्रेस कमेटी) को दिल्लीस्थित मुख्यालयबाट सुरु हुने बताइएको छ ।
सिंहको पार्थिव शरीरलाई उनको निवासबाट आज बिहान ८ बजे एआईसीसी मुख्यालयमा ल्याइने छ, जहाँ जनता र कांग्रेस कार्यकर्ताले बिहान ८:३० देखि ९:३० बजेसम्म उनलाई श्रद्धाञ्जली अर्पण गर्न सक्नेछन् ।
सिंहको अन्तिम संस्कार राजकीय सम्मानका साथ गर्ने सरकारले निर्णय गरको छ ।
